Wednesday 26 February 2020




എയര്‍ ഇന്ത്യയുടെ ഇന്ധന വിലക്ക് നീക്കി എണ്ണക്കമ്പനികള്‍

By Online Desk .08 Sep, 2019

imran-azhar

 

 

ന്യൂഡല്‍ഹി: കൊച്ചിയടക്കം ആറ് വിമാനത്താവളങ്ങളിലുള്ള എയര്‍ ഇന്ത്യയുടെ ഇന്ധന വിലക്ക് നീക്കി എണ്ണക്കമ്പനികള്‍. ഇന്ധനം നല്‍കില്ലെന്ന തീരുമാനം തല്‍ക്കാലത്തേക്ക് മരവിപ്പിക്കാനാണ് എണ്ണക്കമ്പനികളുടെ തീരുമാനം. കുടിശ്ശിക നല്‍കാത്തതിന്റെ പേരിലാണ് ഇന്ധനം നല്‍കുന്നത് നിര്‍ത്താന്‍ എണ്ണക്കമ്പനികള്‍ തീരുമാനമെടുത്തത്. മധ്യസ്ഥ ചര്‍ച്ചകള്‍ക്ക് സര്‍ക്കാര്‍ മുന്‍കൈയെടുത്ത സാഹചര്യത്തിലാണ് ഈ തീരുമാനം.

 

എണ്ണക്കമ്പനികള്‍ക്ക് എയര്‍ ഇന്ത്യ 4500 കോടി രൂപയാണ് നല്‍കാനുള്ളത്. കുടിശ്ശികയിലേക്ക് പ്രതിമാസം 100 കോടി രൂപ വീതം നല്‍കാമെന്ന് ധാരണയായതോടെയാണ് വിലക്ക് നീക്കാന്‍ എണ്ണക്കമ്പനികള്‍ തീരുമാനിച്ചത്. കഴിഞ്ഞമാസം 22നാണ് എയര്‍ ഇന്ത്യക്ക് ഇന്ധനം നല്‍കേണ്ടെന്ന നിലപാട് എണ്ണക്കമ്പനികള്‍ കൈക്കൊണ്ടത്. നഷ്ടത്തിലോടിക്കൊണ്ടിരിക്കുന്ന എയര്‍ ഇന്ത്യക്ക് ഇത് തിരിച്ചടിയായിരുന്നു. ശനിയാഴ്ച വൈകുന്നേരം തന്നെ വിമാനങ്ങള്‍ക്ക് ഇന്ധനം വിതരണം ചെയ്തു തുടങ്ങിയതായി എയര്‍ ഇന്ത്യ വക്താവ് പിടിഐയോട് പറഞ്ഞു. പുണെ, റാഞ്ചി, പട്ന, മൊഹാലി, കൊച്ചി, വിശാഖപട്ടണം എന്നീ വിമാനത്താവളങ്ങളിലായിരുന്നു എയര്‍ ഇന്ത്യ വിമാനങ്ങള്‍ക്ക് ഇന്ധനവിലക്ക് ഏര്‍പ്പെടുത്തിയിരുന്നത്.