Friday 14 December 2018


ഓട്ടോ-ടാക്സി നിരക്ക് കൂട്ടി

By Sooraj Surendran.06 Dec, 2018

imran-azhar

 

 

തിരുവനന്തപുരം: സംസ്ഥാനത്ത് ഓട്ടോ, ടാക്സി നിരക്കുകള്‍ വര്‍ദ്ധിപ്പിച്ചു. ഓട്ടോറിക്ഷയുടെ മിനിമം ചാര്‍ജ് ഒന്നര കിലോമീറ്റര്‍ വരെ 25 രൂപയായും ടാക്സി മിനിമം ചാര്‍ജ് അഞ്ചു കിലോമീറ്റര്‍ വരെ 175 രൂപയുമായാണ് വര്‍ദ്ധിപ്പിച്ചത്. നിലവില്‍ 1.25 കിലോമീറ്റര്‍ വരെ ഓട്ടോറിക്ഷയ്ക്ക് മിനിമം ചാര്‍ജ് 20 രൂപയും ടാക്സിയ്ക്ക് മിനിമം ചാര്‍ജ് അഞ്ചു കിലോമീറ്റര്‍ വരെ 150 രൂപയുമാണ്. ജസ്റ്റിസ് രാമചന്ദ്രന്‍ നായര്‍ കമ്മറ്റി ശുപാര്‍ശകള്‍ പരിഗണിച്ചാണ് ഓട്ടോ-ടാക്സി നിരക്ക് കൂട്ടാന്‍ മന്ത്രിസഭാ യോഗം തീരുമാനിച്ചത്. ഓട്ടോയുടെ കുറഞ്ഞനിരക്ക് 30 രൂപയും ടാക്സിയുടെ കുറഞ്ഞനിരക്ക് 200 രൂപയുമാക്കണമെന്നായിരുന്നു ജസ്റ്റിസ് രാമചന്ദ്രന്‍ കമ്മറ്റി ശുപാര്‍ശ ചെയ്തിരുന്നത്. എന്നാല്‍ ഇത് മന്ത്രിസഭായോഗം അംഗീകരിച്ചില്ല. പകരം ഓട്ടോയുടെ മിനിമം ചാര്‍ജ് 25 രൂപയായും ടാക്സിയുടേത് 175 രൂപയുമാക്കുകയായിരുന്നു. ഔദ്യോഗിക പ്രഖ്യാപനം ഗതാഗതമന്ത്രി ഇന്ന് നിയമസഭയില്‍ നടത്തും.