Monday 22 October 2018



റെയില്‍വേ ജീവനക്കാര്‍ക്ക് ഉല്‍പ്പാദനക്ഷമതാ ബന്ധിത ബോണസിന് മന്ത്രിസഭയുടെ അംഗീകാരം

By Sarath Surendran.11 Oct, 2018

imran-azhar

യോഗ്യതയുള്ള എല്ലാ ഗസറ്റഡിതര ജീവനക്കാര്‍ക്കും 2017-18 സാമ്പത്തിക വര്‍ഷത്തില്‍ 78 ദിവസത്തെ വേതനത്തിന് തുല്യമായ തുക ബോണസായി നിശ്ചയിച്ചു. ഏകദേശം 11.91 ലക്ഷം റെയില്‍വേ ജീവനക്കാര്‍ക്ക് ഇതിന്റെ ഗുണം ലഭിക്കും.

 

 

ന്യൂഡല്‍ഹി : റെയില്‍വേയിലെ യോഗ്യരായ (ആര്‍.പി.എഫ്-ആര്‍.പി.എസ്.എഫ് ഒഴികെ) എല്ലാ ഗസറ്റഡിതര ജീവനക്കാര്‍ക്കും 78 ദിവസത്തെ വേതനത്തിന് തുല്യമായ തുക 2017-18 വര്‍ഷത്തെ ഉല്‍പ്പാദനക്ഷമതാ ബന്ധിത ബോണസായി നല്‍കുന്നതിന് പ്രധാനമന്ത്രി നരേന്ദ്രമോദിയുടെ അദ്ധ്യക്ഷതയില്‍ ചേര്‍ന്ന കേന്ദ്ര മന്ത്രിസഭായോഗം അംഗീകാരം നല്‍കി. റെയില്‍വേ ജീവനക്കാര്‍ക്ക് 78 ദിവസത്തെ ബോണസ് നല്‍കുന്നതിന് 2044.31 കോടി രൂപയുടെ ചെലവ് വരുമെന്നാണ് കണക്കാക്കുന്നത്. ബോണസിന് അര്‍ഹതയുള്ള ഗസറ്റഡിതര റെയില്‍വേ ജീവനക്കാരുടെ വേതനം പ്രതിമാസം 7000 രൂപയായി നിജപ്പെടുത്തി. യോഗ്യതയുള്ള റെയില്‍വേ ജീവനക്കാര്‍ക്ക് 78 ദിവസത്തേക്ക് പരമാവധി ലഭിക്കാവുന്ന തുക 17,951 രൂപയായിരിക്കും. ഈ തീരുമാനത്തിലൂടെ 11.91 ലക്ഷം റെയില്‍വേ ജീവനക്കാര്‍ക്ക് ഗുണമുണ്ടാകുമെന്നാണ് കണക്കാക്കുന്നത്.

 


രാജ്യത്താകമാനം പരന്നുകിടക്കുന്ന എല്ലാ ഗസറ്റഡ് ഇതര റെയില്‍വേ ജീവനക്കാരും (ആര്‍.പി.എഫ്, ആര്‍.പി.എസ്.എഫ് ഒഴികെ) ഉല്‍പ്പാദനക്ഷമതാ ബന്ധിത ബോണസിന് അര്‍ഹരായിരിക്കും. എല്ലാ വര്‍ഷവും ദസറ-പൂജ അവധികള്‍ക്ക് മുമ്പാണ് റെയില്‍വേയിലെ യോഗ്യരായ ജീവനക്കാര്‍ക്ക് ബോണസ് നല്‍കുന്നത്. ഈ വര്‍ഷവും അവധിക്ക് മുമ്പായി മന്ത്രിസഭയുടെ തീരുമാനം നടപ്പാക്കണം. 2017-18 വര്‍ഷത്തെ പി.എല്‍.ബിയായി 78 ദിവസത്തെ വേതനത്തിന് തുല്യമായ തുക നല്‍കുന്നത് റെയില്‍വേയുടെ പ്രകടനം മെച്ചപ്പെടുത്തുന്നതിന് വേണ്ടി ജീവനക്കാര്‍ക്ക് പ്രവര്‍ത്തിക്കാനുള്ള പ്രചോദനമാകുമെന്ന് പ്രതീക്ഷിക്കുന്നു.

 

 

പശ്ചാത്തലം:

 

ഉല്‍പ്പാദനക്ഷമതാ ബന്ധിത ബോണസ് എന്ന ആശയം 1979-80കളില്‍ നടപ്പാക്കിയ കേന്ദ്ര ഗവണ്‍മെന്റിന്റെ പ്രഥമ വകുപ്പാണ് റെയില്‍വേ. രാജ്യത്തിന്റെ സമ്പദ്ഘടനയുടെ പ്രകടനത്തിന് വേണ്ട പശ്ചാത്തല സൗകര്യമെന്ന സുപ്രധാന പങ്ക് വഹിക്കുന്നതായിരുന്നു അന്ന് ഇത് നടപ്പാക്കുമ്പോള്‍ ഉണ്ടായിരുന്ന പരിഗണന. റെയില്‍വേയുടെ മൊത്തത്തിലുള്ള പ്രവര്‍ത്തനത്തിന്റെ അടിസ്ഥാനത്തിലാണ് 1965-ലെ 'ദി പേയ്‌മെന്റ് ഓഫ് ബോണസ് ആക്ടി'നെ ആധാരമാക്കിയുള്ള ബോണസിന് പകരം ഉല്‍പ്പാദനക്ഷമതാ ബന്ധിത ബോണസ്എന്ന ആശയം നടപ്പാക്കിയത്.