Thursday 21 November 2019




ശബരിമലയിലെ നിരാധനാജ്ഞ ലംഘനം; രമേശ് ചെന്നിത്തല ഇന്ന് കോടതിയില്‍ ഹാജരാകും

By anju.26 Mar, 2019

imran-azhar


പത്തനംതിട്ട: ശബരിമല യുവതീ പ്രവേശനത്തെ തുടര്‍ന്ന് നിരോധനാജ്ഞ ലംഘിച്ച കേസില്‍ പ്രതിപക്ഷ നേതാവ് രമേശ് ചെന്നിത്തല ഇന്ന് പത്തനംതിട്ട കോടതിയില്‍ ഹാജരാകും. നിലക്കലില്‍ സംഘടിപ്പിച്ച പ്രതിഷേധത്തില്‍ നിരോധനാജ്ഞ ലംഘിച്ചതുമായി ബന്ധപ്പെട്ട കേസില്‍ ഒന്നാം പ്രതിയാണ് ചെന്നിത്തല. പത്തനംതിട്ട കോടതിയിലാണ് കേസ്. ജാമ്യമെടുക്കാനാണ് രമേശ് ചെന്നിത്തല ഇന്ന് കോടതിയിലെത്തുന്നത്.

 

ഉമ്മന്‍ ചാണ്ടി, എംകെ മുനീര്‍, ബെന്നി ബഹനാന്‍, പിജെ ജോസഫ്, എംകെ പ്രേമചന്ദ്രന്‍, സിപി ജോണ്‍, ദേവരാജന്‍ തുടങ്ങിയ ഒന്‍പതു കോണ്‍ഗ്രസ് നേതാക്കളും ജനപ്രതിനിധികളുമടക്കം 17പേരാണ് കേസില്‍ ഉള്‍പ്പെട്ടിട്ടുള്ളത്. ഉമ്മന്‍ചാണ്ടി അടക്കമുള്ള നേതാക്കള്‍ നേരത്തെ ജാമ്യം എടുത്തിരുന്നു.

 

നവംബര്‍ 20 നാണ് നിലയ്ക്കലിലും പമ്പയിലും നിരോധനാജ്ഞ ലംഘിച്ച് 50തോളം പേരടങ്ങിയ സംഘമെത്തിയത്. എംഎല്‍എമാരും ജില്ലാ പഞ്ചായത്ത് പ്രസിഡന്റും ഒഴികെയുള്ളവര്‍ കെഎസ്ആര്‍ടിസി ബസില്‍ പോവണമെന്ന പൊലീസ് നിലപാടെടുത്തു. ഇതിനെത്തുടര്‍ന്ന് പ്രതിപക്ഷ നേതാവ് രമേശ് ചെന്നിത്തലയും മുന്‍ മുഖ്യമന്ത്രി ഉമ്മന്‍ ചാണ്ടിയും ഉള്‍പ്പെടെയുള്ളവര്‍ റോഡില്‍ കുത്തിയിരുന്നു പ്രതിഷേധിച്ചു. നിരോധനാജ്ഞ ലംഘിക്കാനാണ് തങ്ങള്‍ എത്തിയതെന്ന് ചെന്നിത്തല പറയുകയും ചെയ്തു. തര്‍ക്കത്തിനൊടുവില്‍ സംഘം കെഎസ്ആര്‍ടിസി ബസില്‍ യാത്ര തുടര്‍ന്നു.