Wednesday 23 October 2019




ആരുമില്ലാത്തവര്‍ക്കൊപ്പം പിറന്നാള്‍ ആഘോഷിച്ച് ഉണ്ണി മുകുന്ദന്‍

By Farsana Jaleel.23 Sep, 2017

imran-azhar

 

 

ആരോരുമില്ലാത്തവര്‍ക്കൊപ്പം പിറന്നാള്‍ ആഘോഷിച്ച് ഉണ്ണി മുകുന്ദന്‍. കഴിഞ്ഞ ദിവസം ഉണ്ണി മുകുന്ദന്റെ 30ാം പിറന്നാള്‍ ആയിരുന്നു. താരപരിവേഷങ്ങളൊന്നും കൂടാതെ വളരെ ലളിതമായ രീതിയിലായിരുന്നു ഉണ്ണിയുടെ ഈ പിറന്നാള്‍ ആഘോഷം. സോഷ്യല്‍ മീഡിയയിലൂടെ താരങ്ങളുടെ പിറന്നാള്‍ ആഘോഷങ്ങള്‍ പൊടിപൊടിക്കുമ്പോള്‍ അതില്‍ നിന്നെല്ലാം വ്യത്യസ്തമായി ഉണ്ണി പിറന്നാള്‍ ആഘോഷിച്ചിരിക്കുകയാണ്. തന്റെ മാതാപിതാക്കള്‍ക്കൊപ്പവും ഒറ്റപ്പാലത്തെ തന്റെ വീടിന് സമീപമുള്ള ആരോരുമില്ലാത്ത അന്തേവാസികള്‍ക്കൊപ്പവുമായിരുന്നു ഉണ്ണി തന്റെ 30ാം പിറന്നാള്‍ ആഘോഷിച്ചത്.

 

അന്തേവാസികള്‍ക്കായുള്ള ഉണ്ണിയുടെ ഫെയ്സ്ബുക്ക് പോസ്റ്റ് വായിക്കാം-

 

എല്ലാവര്‍ക്കും എന്റെ നമസ്‌കാരം. ഇന്നലെ എന്റെ ജന്മദിനം ആയിരുന്നു... എനിക്ക് വേണ്ടി പ്രാര്‍ത്ഥിച്ചവര്‍ക്കും ആശംസകള്‍ അറിയിച്ച എല്ലാവര്‍ക്കും എന്റെ ഹൃദയം നിറഞ്ഞ നന്ദി. എന്റെ ഈ ജന്മദിനം ഞാന്‍ ചിലവഴിച്ചത് എന്റെ മാതാപിതാക്കള്‍ക്കൊപ്പം ഒറ്റപ്പാലത്തെ എന്റെ വീട്ടില്‍ ആയിരുന്നു.

 

എന്റെ വീടിന് സമീപമുളള പോളിഗാര്‍ഡനിലെ അന്തേവാസികള്‍ക്കൊപ്പം ഞാന്‍ കുറച്ചു സമയം ചിലവഴിച്ചു... ഇവര്‍ക്കൊപ്പം ചിലവഴിച്ച ആ നിമിഷങ്ങള്‍ ഒരിക്കലും മറക്കാന്‍ കഴിയില്ല. ബുദ്ധി മാന്ദ്യം സംഭവിച്ച മുതിര്‍ന്ന ആണ്‍കുട്ടികളുടെ പുനരധിവസകേന്ദ്രം ആണിത്. ലെക്കിടിയില്‍ 1981 ലാണ് രൂപീകൃതമായത്. ഇതിന്റെ സ്ഥാപകന്‍ ഫാ.പോള്‍ പൂവ്വത്തിങ്കല്‍ ആണ്. അദ്ദേഹം 2005ല്‍ അന്തരിച്ചു.

 

18നും 80നും ഇടയില്‍ പ്രായമുള്ള 109 അംഗങ്ങള്‍ നിലവില്‍ പോളിഗാര്‍ഡനിലുണ്ട്. 90% പേരും മാതാപിതാക്കള്‍ മരണപ്പെട്ടവരും ജുവൈനല്‍ ഹോം എന്നീ സ്ഥലങ്ങളില്‍ സംരക്ഷിക്കുവാന്‍ ആരുമില്ലാതെയായി ഇവിടെ എത്തപ്പെട്ടവരാണ്. 109 പേരില്‍ ഭൂരിഭാഗവും പലവിധ രോഗങ്ങളാലും മറ്റും ക്ലേശ്ശിക്കുന്നവരാണ്. ഇവര്‍ക്കെല്ലാം കൃത്യ സമയങ്ങളില്‍ മെച്ചപ്പെട്ട ചികിത്സ ലഭ്യമാക്കുവാനും ഇവരെ സംരക്ഷിക്കുവാനും ഇപ്പോഴത്തെ ഡയറക്ടര്‍ ശ്രീ.സിജു വിതയത്തിലും 10 ഓളം വരുന്ന സന്നദ്ധ പ്രവര്‍ത്തകരും അടങ്ങിയ ടീം സദാ ജാഗരൂകരാണ്.

 

പോളിഗാര്‍ഡന്റെ പ്രധാന വരുമാന മാര്‍ഗ്ഗം കനിവു വറ്റാത്ത സുമനസ്സുകള്‍ നല്‍കുന്ന സംഭാവനകളാണ്. നിത്യവൃത്തിക്ക് ഒരു പാടു കഷ്ടപ്പെടുന്നുണ്ടെങ്കിലും ഇവിടുത്തെ സഹോദരങ്ങളെ സന്തോഷത്തോടെ പരിപാലിക്കുവാന്‍ ഇവിടുത്തെ പ്രവര്‍ത്തകര്‍ എപ്പോഴും സന്നദ്ധരാണ്. എനിക്ക് വേണ്ടി പ്രാര്‍ത്ഥിച്ചവര്‍ ഇവര്‍ക്കുവേണ്ടിയും പ്രാര്‍ത്ഥിക്കണം. ജാതി മത ഭേതമന്ന്യേ നിങ്ങളാല്‍ കഴിയുന്ന സഹായം അത് ചെറുതായാലും വലുതായാലും ഇവര്‍ക്ക് എത്തിച്ചു കൊടുക്കാന്‍ അഭ്യര്‍ത്ഥിക്കുന്നു. എന്ന് സ്‌നേഹപൂര്‍വ്വം, ഉണ്ണി മുകുന്ദന്‍...

 

Phone No: Siju vithayathil - 9447030 349
944610349
Alc Details
Directorate of Social Action, Poly Garden
Alc No: 073810 1053384
Canara Bank ottapalam
IFSC Code: CNRB 0000 738