Monday 11 December 2017

ജയല​ളി​ത​യു​ടെ സ്വ​ത്ത് ആര്‍ക്കും തൊ​ടാന്‍ ക​ഴി​യാ​ത്ത​തി​ന് പി​ന്നി​ലെ ര​ഹ​സ്യം

By pradeep anand.03 May, 2017

imran-azhar

അതിനിഗൂഢവും അതീവ രഹസ്യവുമായ താന്ത്രിക മാന്ത്രിക പ്രയോഗങ്ങളിലൂടെ മലയാളി മാന്ത്രികര്‍ തീര്‍ത്ത രക്ഷാകവചത്തിലൂടെ ജീവിച്ചിരുന്ന കാലത്ത് തന്നെ തന്റെ സ്ഥാപന ജംഗമ വസ്തുക്കള്‍ക്ക് സുരക്ഷയുറപ്പാക്കിയ ജയലളിത തന്റെ മരണശേഷം പോലും ആര്‍ക്കും അത് ഉപയോഗിക്കാന്‍ അനുമതി ലഭിക്കാത്ത വണ്ണം പ്രതിരോധം തീര്‍ത്തിരിക്കുന്നു എന്ന വിശ്വാസത്തിന് ആക്കം കൂടുകയാണ്. അത് കൈക്കലാക്കാന്‍ ശ്രമിക്കുന്നവര്‍ക്ക് ദുര്‍മരണം ഉള്‍പ്പെടെയുള്ള ദുര്‍വിധികള്‍ അനുഭവിക്കേണ്ടി വരുമെന്നും വിശ്വസിക്കപ്പെടുന്നു. കോടനാട് സംഭവത്തോടെ ഈ വിശ്വാസത്തിന് കൂടുതല്‍ ബലം വയ്ക്കുകയാണ്.

 

 

ചെന്നൈ : ജയലളിതയുടെ വകയായ കോടനാട് എസ്‌റ്റേറ്റിലെ കൊലപാതകവും അതിനെ തുടര്‍ന്ന് കുറ്റവാളികളായ കനകരാജിനും , സയനും സംഭവിച്ച അപടകങ്ങളും പിന്നിലെ കഥകള്‍ ദുരൂഹമായി തുടരുമ്പോള്‍ ഉയരുന്ന ഒരു ചോദ്യമുണ്ട്. ജയലളിതയുടെ സ്വകാര്യ സ്വത്ത് ഒന്നും ആര്‍ക്കും കൈവയ്ക്കാനോ ആഗ്രഹിക്കാനോ പോലും കഴിയാത്ത രീതിയില്‍ തടസങ്ങള്‍ തുടര്‍ച്ചയായി ഉണ്ടാകുന്നതിന് പിന്നിലെ രഹസ്യങ്ങളിലേക്കാണ് ഇപ്പോള്‍ എല്ലാവരുടേയും ശ്രദ്ധ. ജയലളിതയ്ക്ക് സ്ഥലവും കെട്ടിടങ്ങളുമായി 72 കോടി രൂപയുടെ സ്വത്തും നിക്ഷേപങ്ങളും ഓഹരികളുമായി 41.63 കോടി രൂപയുടെ സ്വത്തും ഉണ്ടെന്നാണ് ഔദ്യോഗികമായ സ്വത്ത് വിവരങ്ങള്‍ വെളിപ്പെടുത്തുന്നത്. എന്നാല്‍ ഇതിന് പുറമേ ചുരുക്കം ചില വേണ്ടപ്പെട്ടവര്‍ക്കും ഈ സ്വത്തുക്കളില്‍ പകുതി അവകാശം ഉള്ളവര്‍ക്കും ഉള്ള ഏകദേശ ധാരണ അനുസരിച്ച് അമ്മയ്ക്ക് ഇതിനും എത്രയോ ആയിരം കോടി മടങ്ങ് സ്വത്ത് ഉണ്ടെന്നാണ് പറയപ്പെടുന്നത്. അത് എന്തായാലും ജയലളിതയുടെ കൈ തൊട്ട ഈ സ്വത്ത് വകകളിലൊന്നും ഒരാള്‍ക്ക് പോലും കൈവശം വയ്ക്കാനോ അനുഭവിക്കാനോ ഉള്ള യോഗം ഉണ്ടാകുമെന്ന് തോന്നുന്നില്ലെന്ന വിശ്വാസം ബലപ്പെടുകയാണ്. ജയലളിത മരിച്ചിട്ട് അഞ്ചുമാസം ആകുമ്പോഴേക്കും ഇതേ സ്ഥിതി തുടരുകയാണ്. സ്വത്തിനും പദവിക്കും വേണ്ടി ശ്രമിച്ചവരെല്ലാം ഓരോരോ കെണികളിലും അപകടങ്ങളിലും പെട്ട് നരകയാതന അനുഭവിക്കുന്ന കാഴ്ചയാണ് നാം കാണുന്നത്. ജയലളിതയുടെ ബിനാമി സ്വത്തുക്കള്‍ കൈവശം ഉള്ളവര്‍ പോലും അത് സന്തോഷമായി അനുഭവിക്കാന്‍ കഴിയാത്ത അവസ്ഥയാണ് ഇപ്പോഴുള്ളത്.

 

ഇതിന് പിന്നില്‍ ഇപ്പോള്‍ തമിഴ്‌നാട്ടില്‍ പ്രചരിക്കുന്ന കഥ ഇങ്ങനെയാണ്. ജയലളിത സമ്പാദിച്ച എല്ലാ വസ്തുവകകളും സ്ഥലങ്ങളും നിക്ഷേപങ്ങളും തന്റെ അനുമതിയോ സമ്മതമോ കൂടാതെ ആര്‍ക്കും തൊടാന്‍ പോലും കഴിയാത്ത രീതിയില്‍ ചില പ്രത്യേക ഹോമങ്ങളും താന്ത്രിക് പൂജകളും നടത്തി ജയലളിത എന്നന്നേക്കുമായി ബന്ധിച്ചിരിക്കുന്നു എന്നതാണ് ലഭ്യമായ സൂചനകള്‍. താന്ത്രിക മാന്ത്രിക കര്‍മ്മങ്ങളിലൂടെ പ്രഗത്ഭരായ ഒരുകൂട്ടം മലയാളി മാന്ത്രികര്‍ നടത്തിയ ക്രിയകളുടെ ഫലമായി ചില അദൃശ്യ ശക്തിയുടെ സഹായത്തോടെ ഇവയിലൊന്നും ആര്‍ക്കും തൊടാനോ അനുഭവിക്കാനോ കഴിയാത്ത വണ്ണം അമ്മ ബന്ധനം നടത്തിയിരിക്കുന്നുവെന്നാണ് പ്രചരിക്കുന്ന കഥ. ഈ കര്‍മ്മങ്ങള്‍ക്കെല്ലാം കേന്ദ്രമായ സ്ഥലമാണ് ജയലളിതയുടെ വകയായ കോടനാട് എസ്‌റ്റേറ്റ്. ജയലളിത ആദ്യതവണ മുഖ്യമന്ത്രിയായ അവസരത്തില്‍ തന്നെ ഈ വിധത്തിലുള്ള നൂറിലധികം ദുര്‍മന്ത്രവാദ ബന്ധന ക്രിയകള്‍ ഈ എസ്‌റ്റേറ്റില്‍ നടന്നിരുന്നത്രേ.. തന്റെ സ്വത്തുക്കള്‍ മരണശേഷം പോലും ആര്‍ക്കും കൈവയ്ക്കാന്‍ കഴിയാതിരിക്കാനാണ് അമ്മ ഇത് ചെയ്തതെന്ന് പറയപ്പെടുന്നു. ഈ ബന്ധന രക്ഷാ വലയം ഭേദിച്ച് അകത്ത് കയറി ഇത് വൈകശപ്പെടുത്താന്‍ ആര്‍ക്കും കഴിയാതെ പോകുന്നതും അതുകൊണ്ടാണത്രേ, മാത്രമല്ല അതിന് ശ്രമിച്ചാല്‍ ചോര ചിന്തുകയും ചെയ്യുമെന്നുമുറപ്പാണെന്നും മാന്ത്രികര്‍ പറയുന്നു.


വടകര, കോഴിക്കോട് ഭാഗങ്ങളില്‍ നിന്നുള്ള തന്ത്ര വിദ്യകളില്‍ കേമരായ കുറച്ച് മലയാളി മാന്ത്രികരാണ് ജയലളിതയ്ക്ക് വേണ്ടി അവര്‍ ജീവിച്ചിരുന്ന കാലത്ത് ഭാവിയില്‍ പോലും സ്വത്ത് അന്യാധീനപ്പെട്ട് പോകാതിരിക്കാന്‍ ഈ കര്‍മ്മങ്ങള്‍ ചെയ്തത്. തുടര്‍ച്ചയായി മൂന്ന് ദിവസങ്ങളോളം നീണ്ടു നിന്ന അഹോര കര്‍മ്മങ്ങളും ഇതിന്റെ ഭാഗമായി ചെയ്തിട്ടുണ്ടെന്ന് പറയപ്പെടുന്നു. പല കര്‍മ്മങ്ങളും പല ദുര്‍മൂര്‍ത്തികള്‍ക്കും അവരുടെ ഉപദേവകള്‍ക്കും തൃപ്തി വരത്തക്ക രീതിയിലാണ് ചെയ്തിട്ടുള്ളത്. അതിനാല്‍ ഈ മൂര്‍ത്തികളുടെ ദൃഷ്ടി ഒഴിവാക്കി ഇവ കൈക്കലാക്കുക ആര്‍ക്കും സാധ്യമല്ലായി മാറുന്നു. രക്തചാമുണ്ഡേശ്വരിയാണ് ജയലളിതയുടെ പരദേവത. ബംഗളൂരിലുള്ള അവരുടെ കുടുംബക്ഷേത്രത്തില്‍ പ്രത്യേക പൂജകള്‍ ചെയ്ത് രക്തചാമുണ്ഡി അനുഗ്രഹവും അനുമതിയും വാങ്ങിയ ശേഷമാണ് മേല്‍പ്പറഞ്ഞ രൗദ്രഭാവമൂര്‍ത്തികളുടെ ആവാഹനവും പൂജകളും കോടനാട്ട് വച്ച് മലയാളി മാന്ത്രികര്‍ ജയലളിതയ്ക്ക് വേണ്ടി ചെയ്തിട്ടുള്ളത്. കോഴിക്കോട്ട് നിന്നുള്ള മൂന്നക്ഷര പേരുള്ള ഒരു യുവമാന്ത്രികനാണ് ഈ കര്‍മ്മങ്ങള്‍ക്ക് നേതൃത്വം നല്‍കിയത് എന്നും പറയപ്പെടുന്നു. താന്ത്രിക് രീതിയില്‍ കൗളാചാരപ്രകാരമാണ് മുഴുവന്‍ ക്രിയകളും ഇവിടെ ചെയ്തത്. ഇതില്‍ ഒരു വലിയ ശത്രുസംഹാര പൂജ പോലും അമ്മയുടെ നിര്‍ദ്ദേശത്താല്‍ ചെയ്യപ്പെട്ടുവത്രേ.. അതില്‍ കര്‍മ്മിക്ക് പറ്റിയ ചില ദോഷങ്ങളും വീഴ്ചകളുമാണ് ജയലളിതയുടെ പോലും വീഴ്ചയ്ക്കും അകാല മരണത്തിനും കാരണമായതെന്ന് പോലും വ്യാഖ്യാനങ്ങളുണ്ട്. അത് എന്തായാലും ഇവിടെ നടത്തിയ കര്‍മ്മങ്ങളുടെ ഫലം കൊണ്ട് തന്നെ ആര്‍ക്കും അമ്മയുടേതെന്ന് കരുതപ്പെടുന്ന ഒരു ചെറിയ വസ്തുവില്‍ പോലും ആഗ്രഹമോ താത്പര്യമോ മോഹമോ തോന്നിയാല്‍ അപകടം ഉടന്‍ ഉറപ്പാകുന്നത്. ഇതിന് പുറമേ തന്റെ സ്ഥാനമോ പദവിയോ ആഗ്രഹിക്കുകയോ മോഹിക്കുകയോ ചെയ്യുന്നവര്‍ക്ക് പോലും ദോഷമുണ്ടാകും വിധത്തിലുള്ള സ്വയം രക്ഷാപൂജകളും അമ്മയുടെ നിര്‍ദ്ദേശാനുസരണം നടത്തിയിരുന്നു.

 

 


ഈ പൂജകളുടേയും കര്‍മ്മങ്ങളുടേയും ഫലം കൊണ്ടാണത്രേ ജയലളിതയുടെ മരണശേഷം ഉടന്‍ മുഖ്യമന്ത്രിയാകാന്‍ ശ്രമിച്ച ശശികലയ്ക്ക് അത് സാധിക്കാതെ വന്നത്. അന്ന് ഈ കര്‍മ്മങ്ങള്‍ ചെയ്ത മാന്ത്രികരില്‍ ചിലര്‍ പദവി ആഗ്രഹിക്കരുതെന്ന് ശശികലയോട് പറഞ്ഞിരുന്നു. എന്നാല്‍ അത് ലംഘിച്ച് പ്രവര്‍ത്തിച്ച ശശികലയ്ക്ക് പദവി കിട്ടിയില്ലെന്ന് മാത്രമല്ല തടവറയ്ക്കുള്ളിലും പോകേണ്ടി വന്നു. ജയലളിതയ്ക്ക് ഒരു താത്പര്യവുമില്ലാതിരുന്ന ടി.ടി.വി ദിനകരന്‍ എം.എല്‍.എയും മന്ത്രിയുമാകാന്‍ ശ്രമിച്ച് ഇപ്പോള്‍ കോഴക്കേസില്‍പ്പെട്ട് ഇരുമ്പഴിയെണ്ണുകയും ചെയ്യുന്നു. മാത്രമല്ല, ശശികലയുടെ ഒരു സഹോദരീ പുത്രന്‍ ദുര്‍മരണത്തിന് ഇരയായതും കഴിഞ്ഞ മാസമായിരുന്നു. ജയലളിതയുടെ ഈ ഉഗ്രപൂജകളെക്കുറിച്ച് അറിയാമായിരുന്നത് കൊണ്ടും , ജീവനില്‍ ഭയമുള്ളതും കൊണ്ടും മാത്രമാണ് മുഖ്യമന്ത്രിമോഹം ഉള്ളിലൊതുക്കി ശശികലയുടെ ഭര്‍ത്താവ് നടരാജന്‍ പിന്നിലേക്ക് മാറി നില്‍ക്കുന്നത് എന്നും വാര്‍ത്തയുണ്ട്. ഇവര്‍ക്കാര്‍ക്കും അമ്മയുടെ സമ്പാദ്യത്തിലെ ഒരുതരി പോലും സമാധാനത്തോടെ അനുഭവിക്കാനുള്ള യോഗമുണ്ടാകുകയില്ലെന്ന് ഈ മാന്ത്രികര്‍ അവകാശപ്പെടുന്നുണ്ട്. ഈ വാദം സാധൂകരിക്കുന്ന രീതിയിലാണ് കോടനാട് എസ്‌റ്റേറ്റിലെ കവര്‍ച്ചക്കേസിലും കാര്യങ്ങള്‍ സംഭവിച്ചത്. കവര്‍ച്ചാശ്രമത്തിനിടയില്‍ തന്നെ അവിടെ രക്തം ചിന്തിയത് ശ്രദ്ധിക്കുക. കാവല്‍ക്കാരന്‍ രാം ബഹദൂറിന്റെ രക്തം ബലിയായി നല്‍കിയത് കൊണ്ടാവാം ഇവര്‍ക്ക് കവര്‍ച്ച നടത്താന്‍ കഴിഞ്ഞത്. എന്നാല്‍ വിലപ്പെട്ട രേഖകളുമായി കടന്നവരില്‍ പ്രധാനിയായ കനകരാജിന് നാല്‍പ്പത്തിയെട്ട് മണിക്കൂറിനുള്ളില്‍ തന്നെ അപകടത്തിലൂടെ ജീവന്‍ നഷ്ടപ്പെട്ടു. മണിക്കൂറുകള്‍ക്കകം മറ്റൊരു പ്രധാന പ്രതി സയന് ഭാര്യയും മകളും അപകടത്തിലൂടെ നഷ്ടപ്പെടുകയും സ്വന്തം ജീവിതം തന്നെ തുലാസിലാകും വിധം കാര്‍ അപകടത്തില്‍ ഗുരുതരമായി പരിക്കേറ്റ് ആശുപത്രിയില്‍ കഴിയേണ്ടിയും വരുന്നു. ഒപ്പം കൂട്ടുപ്രതികളെല്ലാം അറസ്റ്റിലാകുകയും ചെയ്തു. ജീവന്‍ തിരിച്ച് കിട്ടിയെങ്കിലും സയന് പഴയത് പോലെ സാധാരണ ജീവിതം നയിക്കാന്‍ കഴിയുമോയെന്നും ഉറപ്പില്ല. വസ്തു ഇടപാടുകളും വിലപ്പെട്ട രേഖകളും ഉള്‍പ്പെടെ കവരാന്‍ ശ്രമിച്ച ഈ ഗൂഢാലോചനയ്ക്ക് പിന്നിലെ ഉന്നതര്‍ക്കും സമാനഗതിയാകും ഒരു പക്ഷെ ഉണ്ടാകുക എന്ന് ഈ മാന്ത്രികര്‍ തന്നെ സൂചന നല്‍കുന്നു.

 

 

അത്ര അഹോരപൂജകള്‍ നടന്ന ഒരു സ്ഥലമാണ് കോടനാട് എസ്‌റ്റേറ്റ്. ഒന്‍പത് ഗേറ്റുകളുള്ള ആയിരത്തിഅറുന്നൂറ് ഏക്കര്‍ സ്ഥലവ്യാപ്തിയുള്ള ഈ എസ്‌റ്റേറ്റ് നീലഗിരി മലനിരയിലെ കൊടുമുടിയായ കോട്ടഗിരിയില്‍ നിന്നും 20 കിലോമീറ്റര്‍ അകലെ ഒറ്റപ്പെട്ട ഒരു ഹൈറേഞ്ച് പ്രദേശമാണ്. ജയലളിതയുടേയും ശശികലയുടേയും പേരിലാണ് ഈ വസതിയെങ്കിലും ജയലളിത തന്നെയായിരുന്നു ഈ എസ്റ്റേറ്റിന്റെ മുഴുവന്‍ അധികാരിയും. വേനല്‍ക്കാല വസതിയായി അമ്മ ഉപയോഗിച്ചിരുന്ന ഈ എസ്‌റ്റേറ്റില്‍ വര്‍ഷത്തില്‍ 3 പ്രാവശ്യമെങ്കിലും രഹസ്യതാന്ത്രിക്മാന്ത്രിക പൂജകള്‍ ഇവിടെ മലയാളീമാന്ത്രികര്‍ നടത്തിയിരുന്നു. അതിന്റെ ശക്തി കൊണ്ട് പല വിജയങ്ങളും നേടിയ അമ്മയ്ക്ക് അതിഭയങ്കരമായ വിശ്വാസം ഇത്തരം കര്‍മ്മങ്ങളില്‍ ഉണ്ടായിരുന്നു. ഒരു പക്ഷെ, ഇത്തരം പൂജകളിലെ വീഴ്ചകള്‍ തന്നെയാവാം ജയലളിതയെ തകര്‍ത്തത് എങ്കിലും അവരുടെ സ്വത്തുക്കള്‍ ആര്‍ക്കും എളുപ്പം കൈക്കലാക്കാന്‍ കഴിയില്ലയെന്ന് വേണം കരുതാന്‍. കാരണം ഈ കവര്‍ച്ചാ സംഭവത്തോടെ ജയലളിതയുടെ സ്വത്തുക്കള്‍ ഏതെല്ലാം പേരുകളിലുണ്ടെന്നും അതിന്റെ കണക്കുകള്‍ വ്യക്തമായി മനസിലാക്കണമെന്ന താത്പര്യം കേന്ദ്ര ഇന്റലിജന്‍സ് ഏജന്‍സികള്‍ക്കും ഉണ്ടായിരിക്കുന്നു. അതുകൊണ്ട് തന്നെ ഈ സ്വത്തുക്കളുടെ കൈമാറ്റമോ വച്ച് അനുഭവമോ ആര്‍ക്കും എളുപ്പം സാധ്യമല്ലാതായി മാറിയിരിക്കുന്നു.അതാണ് ഇപ്പോള്‍ കവര്‍ച്ചയ്ക്ക് പിന്നിലുണ്ടെന്ന് കരുതിയിരിക്കുന്നവരേയും കുഴക്കിയിരിക്കുന്നത്.