Wednesday 24 April 2019


നടവരവായി ലഭിച്ചത് 101 കുപ്പി ഓള്‍ഡ് മങ്ക്; ആചാരക്കുപ്പികള്‍ ലഭിച്ചത് മലനടയിലെ ദുര്യോധന ക്ഷേത്രത്തില്‍

By anju.17 Mar, 2019

imran-azhar


കൊല്ലം: പല തരത്തിലുള്ള ആചരങ്ങളെ പിന്തുടരുന്ന ക്ഷേത്രങ്ങളെക്കുറിച്ച് നാം കേട്ടിട്ടുണ്ട്. ആചാരങ്ങളുടെ പേരില്‍ കേരളം നിരവധി പ്രശ്‌നങ്ങള്‍ നേരിട്ടു കണ്ടതാണ്.ഇപ്പോഴിതാ അതേ കേരളത്തില്‍ മറ്റൊരു വിചിത്ര ആചാരത്തെക്കുറിച്ചാണ് സംസാരം.

 

കൊല്ലം ജില്ലയിലാണ് വിചിത്രമായ ആചാരം വച്ചു പുലര്‍ത്തുന്ന ക്ഷേത്രമുള്ളത്. ഒരു പക്ഷേ ഇന്ത്യയിലെ തന്നെ ഏക ദുര്യോധന ക്ഷേത്രമായ കൊല്ലം ജില്ലയിലെ പോരുവഴി പെരുവിരുതി മലനട ക്ഷേത്രത്തില്‍. ക്ഷേത്രത്തില്‍ മാര്‍ച്ച് 22 ന് നടക്കുന്ന ഉത്സവാഘോഷത്തിന് ക്ഷേത്രത്തിലേക്ക് നടവരവായി ലഭിച്ചത് ഓള്‍ഡ് മങ്കിന്റെ 101 കുപ്പികള്‍.

 

 വടക്കന്‍ കേരളത്തില്‍ തെയ്യങ്ങള്‍ കെട്ടിയാടുമ്‌ബോള്‍ നാടന്‍ കള്ള് ഉപയോഗിച്ചിരുന്നു. എന്നാല്‍ 1954 ല്‍ ഉത്പാദനം തുടങ്ങിയ 42.8 ശതമാനം ആല്‍ക്കഹോള്‍ അടങ്ങിയ ഓള്‍ഡ് മങ്ക് ക്ഷേത്രത്തിലെ നടവരവായതിന് പല കഥകളാണ് പ്രചരിക്കുന്നത്.

 

ഇവിടെ കൗരവരില്‍ ദുര്യോധനന്‍ മുതല്‍ ദുശ്ശളവരെ 101 പേര്‍ക്കും മലനട ഗ്രാമത്തില്‍ ക്ഷേത്രങ്ങളുണ്ട്. ഈ 101 പേര്‍ക്കായാണ് 101 കുപ്പി റം കാഴ്ചവെക്കുന്നത്. പാണ്ഡവരെ ഇല്ലാതാക്കാന്‍ ഇറങ്ങിത്തിരിച്ച ദുര്യോധനന് മലനടയിലെത്തിയപ്പോള്‍ ദാഹം തോന്നി. അടുത്തുള്ള വീട്ടിലെത്തി വെള്ളം ചോദിച്ചപ്പോള്‍ വീട്ടുകാരി കള്ളാണ് നല്‍കിയത്.

 

ഇതിന്റെ സ്മരണയ്ക്കായാണ് ഇപ്പോള്‍ ഓള്‍ഡ് മങ്ക് ക്ഷേത്രത്തിലേക്ക് നല്‍കുന്നത്. ഏതായാലും കാലങ്ങളായുള്ള ആചാരമാണ് അതിനാല്‍ അത് തെറ്റിക്കരുതെന്ന കാര്യത്തില്‍ എല്ലാവരും ഒറ്റക്കെട്ടാണ്. പോരുവഴി പെരുവിരുതി ക്ഷേത്രോത്സവത്തിന് ക്ഷണിച്ചു കൊണ്ടുള്ള കിരണ്‍ ദീപുവിന്റെ ഫേസ്ബുക്ക് പോസ്റ്റാണ് ഇപ്പോള്‍ സാമൂഹ്യമാധ്യമങ്ങളില്‍ ഏറെ ചര്‍ച്ചചെയ്യപ്പെടുന്നത്.