കോവിഡ് കാലം മുതലാണ് വര്‍ക്ക് ഫ്രം ഹോം സമ്പ്രദായം ഇത്രയധികം ജനപ്രീയമായത്. വര്‍ക്ക് ഫ്രം ഹോം ആയതോടെ മീറ്റിങ്ങുകളും മറ്റും വെര്‍ച്ച്വലായി മാറിയിട്ടുണ്ട്.

വെര്‍ച്ച്വര്‍ മീറ്റിങ്ങുകള്‍ക്കിടെ നടക്കുന്ന അബദ്ധങ്ങളും മറ്റും ഇതിന് മുന്‍പും ശ്രദ്ധനേടിയിട്ടുണ്ട്. അത്തരമൊരു രസകരമായ സംഭവമാണ് ഇപ്പോള്‍ ട്വിറ്ററില്‍ വൈറലാകുന്നത്.

മീറ്റിങ്ങിനിടെ ചിപ്സ് കഴിക്കുന്ന ജീവനക്കാരിയെ മാനേജര്‍ കൈയോടെ പൊക്കുന്നതാണ് സംഭവം. വന്ദന ജെയിന്‍ എന്ന ട്വിറ്റര്‍ ഹാന്‍ഡിലില്‍ ആണ് പോസ്റ്റ് പങ്കുവച്ചിരിക്കുന്നത്.

രണ്ട് ചിത്രങ്ങളും പോസ്റ്റിനൊപ്പം പങ്കുവച്ചിട്ടുണ്ട്. ഒന്നില്‍ കഴിച്ചുകൊണ്ടിരുന്ന ചിപ്സിന്റെ പാക്കറ്റും മറ്റൊന്നില്‍ മാനേജറുടെ മെസേജും കാണാം.  'മീറ്റിങ്ങിനിടെ എനിക്ക് മാനേജര്‍ അയച്ച മെസേജ്, ഞാന്‍ പെട്ടോ?' എന്ന കുറിപ്പോടെയാണ് ചിത്രങ്ങള്‍ ട്വീറ്റ് ചെയ്തിരിക്കുന്നത്.

മീറ്റിങ് നടക്കുന്നതിനിടെ ചിപ്സ് കൊറിച്ചുകൊണ്ടിരുന്നപ്പോള്‍ മൈക്ക് മ്യൂട്ട് ചെയ്യാന്‍ മറന്നുപോയതായിരുന്നു സംഭവിച്ച അബദ്ധം. ഒടുവില്‍ 'നിങ്ങള്‍ക്ക് ദയവായി ആ മൈക്ക് ഒന്ന് മ്യൂട്ട് ചെയ്യാമോ?, ചിപ്സ് കഴിക്കുന്ന ശബ്ദം വളരെ ഉച്ചത്തിലാണ്', എന്ന് മാനേജറുടെ മെസേജ് എത്തി.