സന്നിധാനത്തെ തിരക്ക് നിയന്ത്രണം ;ഡിജിറ്റല് മേക്കോവറിന് തയ്യാറെടുത്ത് ശബരിമല
കൊച്ചി: സന്നിധാനത്ത് അനിയന്ത്രിതമായ തിരക്ക് വർധിക്കുന്നതിനാൽ ശബരിമലയിലേക്കുള്ള യാത്ര ഏതാനും മണിക്കൂറുകൾ വൈകിപ്പിക്കാൻ ആവശ്യപ്പെട്ടുകൊണ്ട് നിങ്ങളുടെ മൊബൈൽ ഫോണിലേക്ക് ഒരു സന്ദേശം വരുന്നു; അല്ലെങ്കിൽ കിലോമീറ്ററുകൾ നീളുന്ന വരിയിൽ നിൽക്കാതെ, ഒരു കൗണ്ടറിലെത്തി ക്യുആർ കോഡ് സ്കാൻ ചെയ്ത് നിമിഷങ്ങൾക്കകം അരവണ പ്രസാദം വാങ്ങി മടങ്ങുന്നു- ഇത്തരം കാഴ്ചകൾ ഉടൻ തന്നെ പ്രാബല്യത്തിലെത്തിക്കാൻ ഒരുങ്ങുകയാണ് തിരുവിതാംകൂർ ദേവസ്വം ബോർഡ്. ശബരിമലയുടെ ചരിത്രത്തിലെ ഏറ്റവും വലിയ ഡിജിറ്റൽ നവീകരണത്തിനാണ് ദേവസ്വം ബോർഡ് തുടക്കം കുറിച്ചിരിക്കുന്നത്.റിട്ടയേഡ് ഐഎഎസ് ഉദ്യോഗസ്ഥനായ ഡോ. സന്തോഷ് ബാബുവിന്റെ നേതൃത്വത്തിലുള്ള ഉന്നതാധികാര 'പ്രോജക്ട് മാനേജ്മെന്റ് യൂണിറ്റ്' ഇതിനായുള്ള പ്രവർത്തനങ്ങൾ ആരംഭിച്ചുകഴിഞ്ഞു. ശബരിമല ഉൾപ്പെടെ ദേവസ്വം ബോർഡിന്റെ കീഴിലുള്ള 1,250 ഓളം ക്ഷേത്രങ്ങൾ, സ്കൂളുകൾ, കോളജുകൾ, വാണിജ്യ സ്ഥാപനങ്ങൾ എന്നിവയെല്ലാം പുതിയ ഡിജിറ്റൽ ശൃംഖലയുടെ കീഴിലേക്ക് വരും. ഭക്തരുടെ ബുദ്ധിമുട്ടുകൾ പൂർണമായും ഒഴിവാക്കി എല്ലാ സേവനങ്ങളും സുഗമമാക്കുകയാണ് ലക്ഷ്യമെന്ന് ഡോ. സന്തോഷ് ബാബു പറഞ്ഞു.താമസം ബുക്ക് ചെയ്യൽ, വഴിപാടുകൾ, ബില്ലിങ്, സ്റ്റോക്ക് വിവരങ്ങൾ, പർച്ചേസ്, ഫിനാൻസ് എന്നിവയെല്ലാം ഇനി ഒരൊറ്റ പ്ലാറ്റ്ഫോമിന് കീഴിൽ വരും. ആദ്യഘട്ടത്തിൽ ശബരിമലയ്ക്കാണ് മുൻഗണന. 'നിലവിൽ തീർത്ഥാടകർ പലപ്പോഴും ദർശന സമയത്തിന് 6 മുതൽ 8 മണിക്കൂർ മുൻപ് തന്നെ യാത്ര തിരിക്കാറുണ്ട്. ഇത് വലിയ രീതിയിലുള്ള ഗതാഗതക്കുരുക്കിനും തിരക്കിനും കാരണമാകുന്നു. ഇനി മുതൽ ഭക്തർ വീട്ടിൽ നിന്ന് ഇറങ്ങുന്നത് മുതൽ അവരുടെ യാത്ര നിയന്ത്രിക്കാൻ ഡിജിറ്റൽ സംവിധാനത്തിലൂടെ സാധിക്കും. സന്നിധാനത്തെ തിരക്ക് അനുസരിച്ച്, യാത്ര അല്പം വൈകിപ്പിക്കാൻ ഭക്തർക്ക് നിർദ്ദേശം നൽകാനാകും.' -ഡോ. സന്തോഷ് ബാബു വ്യക്തമാക്കി. വിമാനത്താവളങ്ങളിലെ 'ഡിജി യാത്ര' സംവിധാനത്തിന് സമാനമായി ഭക്തർക്ക് തടസ്സമില്ലാത്ത ദർശനാനുഭവം ശബരിമലയിൽ ഒരുക്കുകയാണ് തന്റെ സ്വപ്നമെന്നും അദ്ദേഹം കൂട്ടിച്ചേർത്തു.വഴിപാട് ബില്ലുകൾക്കായി ഇനി വരി നിൽക്കേണ്ടി വരില്ല. ഓൺലൈനായി പണമടച്ച ശേഷം ലഭിക്കുന്ന ക്യുആർ കോഡ് കൗണ്ടറിൽ കാണിച്ച് പ്രസാദം വാങ്ങാം. പണം, യുപിഐ ഉൾപ്പെടെ എല്ലാത്തരം ഡിജിറ്റൽ പേയ്മെന്റുകളും ഇതിനായി ഉപയോഗിക്കാം. ലക്ഷക്കണക്കിന് തീർത്ഥാടകർക്ക് അരവണയും അപ്പവും വേഗത്തിൽ വിതരണം ചെയ്യുന്നതിനായി എടിഎം മാതൃകയിലുള്ള 'ഓട്ടോമേറ്റഡ് വെൻഡിങ് മെഷീനുകൾ' സ്ഥാപിക്കുന്ന കാര്യവും പരിഗണനയിലാണ്.
തീർത്ഥാടകർക്കുള്ള സൗകര്യങ്ങൾ മാത്രമല്ല, ദേവസ്വം ബോർഡിന്റെ ആഭ്യന്തര കാര്യങ്ങളും പൂർണമായി ഡിജിറ്റലൈസ് ചെയ്യും. ശർക്കര, നെയ്യ് തുടങ്ങിയ സാധനങ്ങൾ വാങ്ങുന്നതും, അക്കൗണ്ട്സ്, ജീവനക്കാരുടെ വിവരങ്ങൾ, ലേല നടപടികൾ, നിയമപരമായ രേഖകൾ എന്നിവയെല്ലാം കമ്പ്യൂട്ടർവൽക്കരിക്കും. ഇത് ഭരണത്തിൽ സുതാര്യത കൊണ്ടുവരുകയും അഴിമതിക്കുള്ള സാധ്യതകൾ ഇല്ലാതാക്കുകയും ചെയ്യും.
കേരള ഹൈക്കോടതിയുടെ ഉത്തരവ് പ്രകാരം രൂപീകരിച്ച പ്രോജക്ട് മാനേജ്മെന്റ് യൂണിറ്റിന്റെ പ്രവർത്തനങ്ങൾ കോടതി നേരിട്ടാണ് നിരീക്ഷിക്കുന്നത്. 24 മാസം കൊണ്ട് പൂർത്തിയാക്കാൻ ലക്ഷ്യമിടുന്ന പദ്ധതിക്ക് ആദ്യവർഷം 33.25 കോടി രൂപയും, ആകെ ചിലവ് 70 കോടി രൂപയുമാണ് നിശ്ചയിച്ചിരിക്കുന്നത്. മാറ്റങ്ങളെ എല്ലാവരും പെട്ടെന്ന് ഉൾക്കൊള്ളാൻ മടിക്കുന്നത് ഒരു വെല്ലുവിളിയാണെങ്കിലും, ഈ പദ്ധതിക്ക് ദേവസ്വം ബോർഡ് പ്രസിഡന്റ് കെ. ജയകുമാർ നൽകുന്ന പിന്തുണ വലിയ കരുത്താണെന്ന് സന്തോഷ് ബാബു പറഞ്ഞു. വരാനിരിക്കുന്ന മണ്ഡല-മകരവിളക്ക് തീർത്ഥാടനത്തിന് മുൻപായി ശബരിമലയിലെ പ്രധാന ഡിജിറ്റൽ മാറ്റങ്ങൾ നടപ്പാക്കാനാണ് ടീമിന്റെ ശ്രമം.
