വാഷിങ്ടണ്‍: 2021 ലെ ക്യാപിറ്റോള്‍ ലഹളയെ തുടര്‍ന്ന് വിലക്ക് ഏര്‍പ്പെടുത്തിയതിന് ശേഷം യുഎസ് മുന്‍ പ്രസിഡന്റ് ഡോണള്‍ഡ് ട്രംപ് ഫേസ്ബുക്കില്‍ തിരിച്ചെത്തും.

മെറ്റയുടെ മറ്റൊരു സ്ഥാപനമായ ഇന്‍സ്റ്റഗ്രാമിലേക്കും ട്രംപ് തിരിച്ചെത്തും. ഫേസ്ബുക്കിന്റെ മാതൃകമ്പനിയായ മെറ്റയാണ് ഈ വിവരം അറിയിച്ചത്. അടുത്ത ദിവസങ്ങളില്‍ തന്നെ ഡോണള്‍ഡ് ട്രംപിന്റെ അക്കൗണ്ടുകള്‍ പുനഃസ്ഥാപിക്കുമെന്ന് മെറ്റയുടെ ആഗോളകാര്യ പ്രസിഡന്റ് നിക് ക്ലെഗ് വാര്‍ത്താക്കുറിപ്പില്‍ അറിയിച്ചു.

അതേസമയം, മെറ്റയുടെ നയങ്ങളും നിയമങ്ങളും ലംഘിച്ചാല്‍ വീണ്ടും വിലക്കേര്‍പ്പെടുത്തുമെന്നും നിക് ക്ലെഗ് വ്യക്തമാക്കി. ഫേസ്ബുക്കിലേക്ക് തിരിച്ചെത്തുമെന്ന് ട്രംപ് സ്ഥിരീകരിച്ചിട്ടില്ല.

വിലക്കിന് പിന്നാലെ ഫേസ്ബുക്കിനെ വിമര്‍ശിച്ച് ട്രംപ് രംഗത്തെത്തിയിരുന്നു. തന്റെ അഭാവത്തില്‍ ഫെയ്‌സ്ബുക്കിന് 'കോടിക്കണക്കിന് ഡോളര്‍' നഷ്ടം വന്നുവെന്നും ട്രംപ് പരിഹസിച്ചിരുന്നു.

ട്വിറ്ററും ട്രംപിനെ വിലക്കിയിരുന്നു. ടെസ്ല ഉടമ ഇലോണ്‍ മസ്‌ക് ഉടമയായതിന് ശേഷമാണ് ട്രംപിന് ട്വിറ്റര്‍ അക്കൗണ്ട് വീണ്ടും തിരിച്ച് നല്‍കിയത്.