കോതമംഗലം: നെല്ലിക്കുഴിയില്‍ സ്വകാര്യ ഡെന്റല്‍ കോളേജ് വിദ്യാര്‍ഥിനിയെ വെടിവെച്ച് കൊന്ന് യുവാവ് ജീവനൊടുക്കി. കണ്ണൂര്‍ സ്വദേശി മാനസയാണ് രാഖില്‍ എന്ന യുവാവിന്റെ വെടിയേറ്റ് മരിച്ചത്. മാനസയെ കൊലപ്പെടുത്തിയ ശേഷം രാഖില്‍ സ്വയം നിറയൊഴിച്ച് ആത്മഹത്യ ചെയ്യുകയായിരുന്നു. കണ്ണൂര്‍ നാറാത്ത് സ്വദേശിയായ മാനസ നെല്ലിക്കുഴിയിലെ ഇന്ദിര ഗാന്ധി ഡെന്റല്‍ കോളേജിലെ ഹൗസ് സര്‍ജനാണ്.
തൃശൂർ: പാലിയേക്കരയില്‍ ദേശീയപാതയുടെ സര്‍വീസ് റോഡിനോടു ചേര്‍ന്ന മദ്യവിൽപ്പനാശാല അടപ്പിച്ചു. മദ്യവില്പന ശാലകള്‍ക്കു മുന്‍പിലെ തിരക്ക് നിയന്ത്രിക്കണമെന്ന ഹൈക്കോടതി നിർദേശം കാറ്റിൽപ്പറത്തി കൊണ്ട്, കോവിഡ് മാനദണ്ഡങ്ങൾ പോലും ലംഘിച്ചുകൊണ്ടാണ് ഔട്ട്‍ലെറ്റിൽ മദ്യവില്പന നടന്നത്. പഞ്ചായത്തും സെക്ടറല്‍ മജിസട്രേറ്റും നോട്ടിസ് നല്‍കിയതിനെ തുടര്‍ന്നാണ് നടപടി.
എ പി അബ്ദുള്‍ വഹാബ് വിഭാഗവുമായി ചേര്‍ന്ന് പോകാന്‍ സാധിക്കില്ലെന്ന് സംസ്ഥാന ട്രഷററും ദേശീയ ജനറല്‍ സെക്രട്ടറിയുമായ എഎംഎന്‍ നൗഷാദ് പറഞ്ഞു. ഐഎന്‍എല്‍ സമവായ ശ്രമങ്ങള്‍ക്കിടെയാണ് അദ്ദേഹത്തിന്റെ പ്രതികരണം. പ്രത്യയ ശാസ്ത്രമാണ് വലുത്, മന്ത്രിസ്ഥാനമല്ലെന്നും അദ്ദേഹം തുറന്നടിച്ചു. ഒന്നോ രണ്ടോ പേര്‍ പോയാല്‍ വലിയൊരു പ്രസ്ഥാനം പിളരുകയില്ലെന്നും അദ്ദേഹം പറഞ്ഞു. അതേസമയം എ പി അബ്ദുള്‍ വഹാബ് വിഭാഗം പ്രശ്‌നപരിഹാരത്തിന് സാധ്യത തേടി മന്ത്രി അഹമ്മദ് ദേവര്‍കോവിലുമായി ചര്‍ച്ച നടത്തിയിരുന്നു.
കരുവന്നൂര്‍ സഹകരണ ബാങ്ക് അഡ്മിനിസ്‌ട്രേറ്റര്‍ സ്ഥാനത്ത് നിന്ന് എം സി അജിതിനെ മാറ്റി. പകരം ചുമതല മൂന്നംഗ സമിതിക്ക് കൈമാറി. വിമര്‍ശനങ്ങള്‍ ശക്തമായ സാഹചര്യത്തിലാണ് അജിതിനെ അഡ്മിനിസ്‌ട്രേറ്റര്‍ സ്ഥാനത്ത് നിന്ന് മാറ്റിയത്. സിപിഐഎമ്മിന് അനുകൂലമായ നിലപാടാണ് എം സി അജിത് സ്വീകരിച്ചതെന്ന് ആരോപണമുയര്‍ന്നതിന് പിന്നാലെയാണ് നടപടി.
തിരുവനന്തപുരം: കോവിഡ് രണ്ടാം തരംഗ വ്യാപനത്തിന്റെ പശ്ചാത്തലത്തിൽ സാമ്പത്തിക പാക്കേജുമായി ധനമന്ത്രി കെ.എൻ ബാലഗോപാൽ. വ്യാപാരികൾക്കും, വ്യവസായികൾക്കും, കർഷകർക്കും അനുകൂല പ്രഖ്യാപനങ്ങളാണ് പുതിയ പാക്കേജിലുള്ളത്. കെഎസ്എഫ്ഇ ചെറുകിട സംരംഭകർക്ക് നൽകിയ വായ്പകൾക്ക് ഒരു വർഷത്തേക്ക് മൊറട്ടോറിയം. ഒരു കോടി രൂപ വരെ വായ്പ ലഭിക്കുന്ന സ്റ്റാർട്ട് ആപ്പ് കേരള വായ്പ പദ്ധതി ഉടൻ വരും. സർക്കാർ നൽകിയ കടമുറികളുടെ വാടക ജൂലൈ മുതൽ ഡിസംബർ വരെ ഒഴിവാക്കിയിട്ടുണ്ട്.
ഷിംല: ഹിമാചൽ പ്രാദേശിലുണ്ടായ മേഘവിസ്‌ഫോടനത്തിലും, മിന്നൽ പ്രളയത്തിലുംപ്പെട്ട് ലാഹുൽ സ്പിറ്റിയിൽ 204 വിനോദസഞ്ചാരികൾ കുടുങ്ങി കിടക്കുന്നു. ഇവരെ സുരക്ഷിത സ്ഥാനങ്ങളിലേക്ക് മാറ്റുന്നത് വെല്ലുവിളി നിറഞ്ഞ ദൗത്യമാണ്. പ്രകൃതി ദുരന്തങ്ങളിൽ റോഡുകൾ തകർന്നതും, മോശം കാലാവസ്ഥയുമാണ് രക്ഷാപ്രവർത്തനത്തെ പ്രതികൂലമായി ബാധിക്കുന്നത്. ഇവരെ എയർ ലിഫ്റ്റ് ചെയ്ത് സുരക്ഷിത സ്ഥാനങ്ങളിലേക്ക് മാറ്റാനുള്ള നടപടികൾ ഉടൻ സ്വീകരിക്കുമെന്ന് ഹിമാചൽ സർക്കാർ അറിയിച്ചു.
കോഴിക്കോട്: ജില്ലയിൽ കല്ലായി റെയിൽവേ സ്റ്റേഷനടുത്ത് പാളത്തിൽ സ്‌ഫോടക വസ്തു കണ്ടെത്തി. റെയിൽവേ പൊലീസ് പരിശോധന നടത്തുകയാണ്. പടക്കം പോലുള്ള വസ്തുവാണ് കണ്ടെത്തിയത്. സംഭവവുമായി ബന്ധപ്പെട്ട് കൂടുതൽ വിവരങ്ങൾ ലഭ്യമല്ല. സിറ്റി പൊലീസ് കമ്മിഷണറും ബോബ് സ്‌ക്വാഡും ഡോഗ് സ്‌ക്വാഡും സ്ഥലത്തെത്തിയിട്ടുണ്ട്.
തിരുവനന്തപുരം: നിയമസഭാ കയ്യാങ്കളി കേസുമായി ബന്ധപ്പെട്ട് പ്രതിപക്ഷം സഭാ നടപടികള്‍ ബഹിഷ്കരിച്ചു. രാജി ആവശ്യം മുഖ്യമന്ത്രി തള്ളിയതോടെയാണ് പ്രതിപക്ഷം സഭാ നടപടികള്‍ ബഹിഷ്കരിച്ചത്. നിഷേധാത്മക നിലപാടാണ് മുഖ്യമന്ത്രിക്കെന്ന് പ്രതിപക്ഷ നേതാവ് വി ഡി സതീശന്‍ പറഞ്ഞു.
തിരുവനന്തപുരം: സംസ്ഥാനത്ത് വീണ്ടും സിക്ക വൈറസ് ബാധ. അഞ്ച് പേർക്കാണ് ഇന്ന് രോഗം സ്ഥിരീകരിച്ചത്. തിരുവനന്തപുരം നെയ്യാറ്റിൻകര സ്വദേശിയായ 53കാരൻ, പേട്ട സ്വദേശിയായ 44കാരൻ, 27കാരിയായ നേമം സ്വദേശിനി, വെള്ളയമ്പലം സ്വദേശിനിയായ 32കാരി, എറണാകുളത്ത് ജോലി ചെയ്യുന്ന തിരുവനന്തപുരം സ്വദേശിനിയായ 36കാരി എന്നിവർക്കാണ് രോഗം സ്ഥിരീകരിച്ചത്.
തിരുവനന്തപുരം: വട്ടിയൂർക്കാവില്‍ പതിനൊന്നുകാരനെ ഷാൾ കഴുത്തിൽ കുരുങ്ങി മരിച്ച നിലയിൽ കണ്ടെത്തി. മൃതദേഹം പോസ്റ്റുമോർട്ടത്തിനായി ആശുപത്രിയിലേക്ക് മാറ്റി. ചന്ദ്രബോസിന്‍റെ മകൻ ആഷിക്കാണ് മരിച്ചത്. ഇളയസഹോദരനൊപ്പം കളിക്കുന്നതിനിടെ ഷാൾ ജനലിൽ കുടുങ്ങിയതായിരിക്കും എന്നാണ് കരുതരുന്നത്.
