മലപ്പുറം ജില്ല വിഭജിക്കണം ;പിന്തുണയുമായി യുഡിഎഫ്; മുഖ്യമന്ത്രിയെ കാണും
കോഴിക്കോട്: മലപ്പുറം ജില്ല വിഭജിക്കണമെന്ന ആവശ്യത്തിന് യുഡിഎഫ്ഔദ്യോഗിക പിന്തുണ പ്രഖ്യാപിച്ചു . ഇതോടെ കോൺഗ്രസും മുസ്ലിം ലീഗും ഇതുവരെ ഔദ്യോഗികമായി ഏറ്റെടുക്കാതിരുന്ന വിഷയത്തിൽ നിർണായക രാഷ്ട്രീയ നീക്കമാണ് ഉണ്ടായിരിക്കുന്നത്.മലപ്പുറം യുഡിഎഫ് ജില്ലാ ചെയർമാൻ കെ.പി. അബ്ദുൽ മജീദ്, ജില്ല വിഭജന വിഷയം അടുത്തിടെ ചേർന്ന യുഡിഎഫ് ജില്ലാ യോഗത്തിൽ ചർച്ച ചെയ്തതായി അറിയിച്ചു. ആവശ്യം സംസ്ഥാന സർക്കാരിന്റെ ശ്രദ്ധയിൽപ്പെടുത്തുന്നതിനായി മുഖ്യ മന്ത്രി വി.ഡി. സതീശനെയും ബന്ധപ്പെട്ട മന്ത്രിമാരെയും സമീപിക്കാൻ തീരുമാനിച്ചതായും അദ്ദേഹം പറഞ്ഞു.
“ജനസംഖ്യാ വർധനവിന് അനുസൃതമായ വിഭവ വിഹിതം മലപ്പുറത്തിന് ലഭിക്കുന്നില്ല. ഭരണപരമായും വികസനപരമായും ജില്ല നേരിടുന്ന പ്രശ്നങ്ങൾക്ക് പ്രായോഗിക പരിഹാരമാണ് വിഭജനം,” അബ്ദുൽ മജീദ് വ്യക്തമാക്കി.
അതേസമയം, വിഷയത്തിൽ മുസ്ലിം ലീഗ് ഇതുവരെ ഔദ്യോഗിക നിലപാട് സ്വീകരിച്ചിട്ടില്ല. ജില്ല വിഭജന ആവശ്യം യുഡിഎഫ് യോഗത്തിൽ ചർച്ചയായതായി ലീഗ് ജില്ലാ ജനറൽ സെക്രട്ടറി അബ്ദുൽ ഹമീദ് സ്ഥിരീകരിച്ചെങ്കിലും, സർക്കാരിനെ സമീപിക്കുന്നതുമായി ബന്ധപ്പെട്ട് പാർട്ടി അന്തിമ തീരുമാനമെടുത്തിട്ടില്ലെന്ന് അദ്ദേഹം പറഞ്ഞു.
“ജില്ല വിവിധ വികസന വെല്ലുവിളികൾ നേരിടുന്നുണ്ട്. വിഭജനം സംബന്ധിച്ച ആവശ്യം ഉയരുന്നുണ്ടെങ്കിലും, പാർട്ടി തലത്തിൽ ഇതുസംബന്ധിച്ച് വിശദമായ ചർച്ച നടന്നിട്ടില്ല,” അദ്ദേഹം കൂട്ടിച്ചേർത്തു.
മലപ്പുറം വിഭജന ആവശ്യം കഴിഞ്ഞ കുറേ വർഷങ്ങളായി വിവിധ സംഘടനകളും രാഷ്ട്രീയ നേതാക്കളും ഉയർത്തിക്കൊണ്ടിരിക്കുന്ന വിഷയമാണ്. സമസ്തയുടെ ഇരുവിഭാഗങ്ങളും, വെൽഫെയർ പാർട്ടിയും, എസ്ഡിപിഐയും ആവശ്യം പരസ്യമായി പിന്തുണച്ചിട്ടുണ്ട്. ഈ വർഷം മേയിൽ യൂത്ത് ലീഗ് തിരൂരങ്ങാടി മണ്ഡലം കമ്മിറ്റി, തിരൂരങ്ങാടി ആസ്ഥാനമായി പുതിയ ജില്ല രൂപീകരിക്കണമെന്ന പ്രമേയവും പാസാക്കിയിരുന്നു.
2015-ൽ മലപ്പുറം ജില്ലാ പഞ്ചായത്ത് ജില്ല വിഭജിക്കണമെന്ന ആവശ്യം ഉന്നയിച്ച് പ്രമേയം പാസാക്കിയിരുന്നു. 2019-ൽ മുൻ ഐയുഎംഎൽ എംഎൽഎ കെ.എൻ.എ. ഖാദറും വിഷയം നിയമസഭയിൽ ഉന്നയിച്ചിരുന്നു. അടുത്തിടെ തിരൂർ എംഎൽഎ കുറുക്കോളി മൊയ്തീനും തിരൂർ, തിരൂരങ്ങാടി, പൊന്നാനി താലൂക്കുകൾ ഉൾപ്പെടുത്തി പുതിയ ജില്ല രൂപീകരിക്കണമെന്ന് നിർദേശിച്ചിരുന്നു
ജനസംഖ്യാ വർധനവും ഭരണഭാരവും കണക്കിലെടുത്ത് ജില്ല വിഭജിക്കണമെന്നാണ് അനുകൂലികളുടെ വാദം. എന്നാൽ, ഹിന്ദു ഐക്യവേദി ഉൾപ്പെടെയുള്ള സംഘടനകൾ ഈ ആവശ്യത്തെ തുടർച്ചയായി എതിർക്കുന്നുണ്ട്.
