മെഡിക്ലെയിം നിരസിക്കാന് പുകവലി ശീലം കാരണമല്ല ;ഇന്ഷുറന്സ് കമ്പനി നഷ്ടപരിഹാരം നല്കണമെന്ന് കോടതി
കൊച്ചി: പുകവലി ശീലം ഉണ്ടായിരുന്നു എന്നതിന്റെ പേരില് മെഡിക്ലെയിം നിരസിക്കാന് കഴിയില്ലെന്ന് എറണാകുളം ഉപഭോക്തൃ തര്ക്ക പരിഹാര കോടതി വിധി പ്രസ്താവിച്ചു . ഇന്ഷുറന്സ് പോളിസിയിലെ ഒഴിവാക്കല് വ്യവസ്ഥകള് മെഡിക്കല് തെളിവുകളില്ലാതെ അനുമാനങ്ങളുടെ പേരില് പ്രയോഗിക്കാനാകില്ലെന്നും കോടതി വ്യക്തമാക്കി. മൂവാറ്റുപുഴ സ്വദേശിനി ഷൈബി ജോസ് സമര്പ്പിച്ച പരാതിയിലാണ് കോടതി വിധി.മുമ്പ് രോഗി പുകവലിച്ചിരുന്നുവെന്ന ആശുപത്രി രേഖയിലെ പരാമര്ശം എടുത്തു പറഞ്ഞ് പിതാവ് ജോസ് മത്തായിയുടെ ഇന്ഷൂറന്സ് ക്ലെയിം നിരസിച്ച കമ്പനിയുടെ നടപടിക്കെതിരെ ഷൈബി ജോസ് കോടതിയെ സമീപിച്ചു. അന്നനാളത്തിലെ അര്ബുദത്തെ തുടര്ന്ന് ജോസ് മത്തായിയെ ആലുവയിലെ സ്വകാര്യ ആശുപത്രിയില് പ്രവേശിപ്പിച്ചിരുന്നു. ചികിത്സയ്ക്കായി 4,63,928 രൂപ ചെലവായി. സര്ക്കാര് ജീവനക്കാര്ക്കും പെന്ഷന്കാര്ക്കുമായുള്ള മെഡിസെപ്പ് പദ്ധതി പ്രകാരം ക്ലെയിം സമര്പ്പിച്ചെങ്കിലും രോഗി മുമ്പ് പുകവലിച്ചിരുന്ന ആളാണെന്ന കാരണത്തില് ക്ലെയിം നിരസിക്കുകയായിരുന്നു. പുകവലിച്ചതു മൂലം ഉണ്ടാകുന്ന രോഗങ്ങള് പോളിസി പരിധിയില് വരില്ലെന്നുള്ള ഒഴിവാക്കല് വ്യവസ്ഥ ചൂണ്ടിക്കാട്ടിയാണ് ക്ലെയിം നിരസിച്ചത്.കമ്പനിയുടെ നടപടി വീഴ്ചയാണെന്ന് ഡി ബി ബിനു, വി രാമചന്ദ്രന്, ടി എന് ശ്രീവിദ്യ എന്നിവരടങ്ങിയ ബെഞ്ച് വ്യക്തമാക്കി. മെഡിസെപ്പ് പദ്ധതി പ്രകാരം അനുവദനീയമായ പരമാവധി തുകയായ മൂന്നു ലക്ഷം രൂപ നല്കാനാണ് വിധി. ഇന്ഷുറന്സ് നിഷേധിച്ചതുമൂലം ഉണ്ടായ മാനസിക വിഷമങ്ങള്ക്കും സാമ്പത്തിക ബുദ്ധിമുട്ടുകള്ക്കും കോടതി ചെലവിനും 15,000 രൂപ നഷ്ടപരിഹാരവും കമ്പനി നല്കണം
