ചേര്‍പ്പ്: ആള്‍ക്കൂട്ട ആക്രമണത്തില്‍ ബസ് ഡ്രൈവര്‍ ചിറയ്ക്കല്‍ സഹാര്‍ (33) കൊല്ലപ്പെട്ട കേസില്‍ പ്രധാന പ്രതികളില്‍ ഒരാള്‍കൂടി പൊലീസിന്റെ പിടിയില്‍. ചിറയ്ക്കല്‍ മച്ചിങ്ങല്‍ അഭിലാഷ് (27) ആണ് അറസ്റ്റിലായത്. സംഭവത്തിനുശേഷം യു.എ.ഇ.യിലെ റാസല്‍ഖൈമയിലേക്ക് മുങ്ങിയ പ്രതിയെ വെള്ളിയാഴ്ച രാത്രി നെടുമ്പാശ്ശേരി വിമാനത്താവളത്തില്‍നിന്നാണ് കസ്റ്റഡിയിലെടുത്തത്.

തുടര്‍ന്ന് അഭിലാഷിനെ രാത്രി പതിനൊന്നോടെ ചേര്‍പ്പ് പോലീസ് സ്റ്റേഷനിലെത്തിച്ചു. അഭിലാഷിനോട് കീഴടങ്ങാന്‍ ബന്ധുക്കള്‍ മുഖേന പോലീസ് സമ്മര്‍ദം ചെലുത്തിയിരുന്നു.ഇതോടെ കേസില്‍ 10 പ്രതികള്‍ പിടിയിലായി. ഇനിയും നാലുപേരെക്കൂടി കിട്ടാനുണ്ട്.

അഭിലാഷ് അടക്കം എട്ട് പ്രതികളുടെ പേരില്‍ പോലീസ് ലുക്ക് ഔട്ട് നോട്ടീസ് പുറത്തിറക്കിയിരുന്നു. ഇതില്‍ കറുപ്പം വീട്ടില്‍ അമീര്‍ (30), കൊടക്കാട്ടില്‍ അരുണ്‍ (21), മച്ചിങ്ങല്‍ ഡിനോണ്‍ (28), ചിറയ്ക്കല്‍ കറപ്പംവീട്ടില്‍ അനസ് (23) എന്നിവര്‍ നേരത്തെ അറസ്റ്റിലായിരുന്നു.

മാത്രമല്ല പ്രതികളെ രക്ഷപ്പെടാന്‍ സഹായിച്ച കുറ്റത്തിന് സുഹൈല്‍, നിരഞ്ജന്‍, കാറളം നവീന്‍, ചേര്‍പ്പ് പടിഞ്ഞാട്ടുമുറി സുഹൈല്‍, ഫൈസല്‍ എന്നിവരും അറസ്റ്റിലായിരുന്നു.ചിറയ്ക്കല്‍ കോട്ടം നിവാസികളായ കൊടക്കാട്ടില്‍ വിജിത്ത് (37), കരിക്കന്ത്ര വിഷ്ണു (31), നെല്ലിപ്പറമ്പില്‍ രാഹുല്‍ (34), മൂര്‍ക്കനാട് കാരണയില്‍ ഗിഞ്ചു (28) എന്നിവരെയാണ് ഇനി കിട്ടനുള്ളത്.ഫെബ്രുവരി 18-ന് രാത്രിയാണ് സഹാറിന് മര്‍ദനമേല്‍ക്കുന്നത്. ഗുരുതരമായി പരിക്കേറ്റ സഹാര്‍ മാര്‍ച്ച് ഏഴിന് മരിച്ചു.