ഷാർജ: 17 ഫുട്ബോൾ മൈതാനങ്ങളുടെ വലിപ്പമുള്ള പുതിയ പാർക്ക് ഷാർജയിൽ ഉദ്ഘാടനം ചെയ്തു.മുനിസിപ്പൽ കൗൺസിലും ഷാർജ സിറ്റി മുനിസിപ്പാലിറ്റിയും ചേർന്ന് 70,085 ചതുരശ്ര മീറ്റർ വിസ്തൃതിയുള്ള അൽ ഖറായിൻ പാർക്ക് 2 ഉദ്ഘാടനം ചെയ്തതോടെ ഷാർജയിൽ ഒരു പുതിയ പാർക്ക് തുറന്നു.

സുപ്രീം കൗൺസിൽ അംഗവും ഷാർജ ഭരണാധികാരിയുമായ ഹിസ് ഹൈനസ് ഡോ ഷെയ്ഖ് സുൽത്താൻ ബിൻ മുഹമ്മദ് അൽ ഖാസിമിയുടെ നിർദേശപ്രകാരമാണ് പുതിയ പാർക്ക്.പുതിയ പാർക്ക് എമിറേറ്റിലെ ഗ്രീൻ ബെൽറ്റിനെ ശക്തിപ്പെടുത്തുകയും ഓരോ അയൽപക്കത്തിനും ഒരു പാർക്ക് നൽകിക്കൊണ്ട് കുടുംബങ്ങളുടെ സ്വകാര്യത സംരക്ഷിക്കുന്നതിനൊപ്പം ഗുണനിലവാരമുള്ള സേവന സൗകര്യങ്ങൾ പ്രദാനം ചെയ്യുകയും ചെയ്യുന്നു.

ഷാർജ മുനിസിപ്പൽ കൗൺസിൽ ചെയർമാൻ സലേം അലി അൽ മുഹൈരി, മുവൈലെ സബർബ് കൗൺസിൽ ചെയർമാൻ ഖാലിദ് അബ്ദുല്ല അൽ റബൂയി, അൽ ഹംരിയ മുനിസിപ്പാലിറ്റി ഡയറക്ടർ മുബാറക് അൽ ഷംസി,മറ്റ് ഷാർജ കൗൺസിൽ അംഗങ്ങളും നഗരസഭ ഉദ്യോഗസ്ഥരും ഉദ്ഘാടന ചടങ്ങിൽ പങ്കെടുത്തു.

താമസക്കാർക്കും,സന്ദർശകർക്കും വേണ്ടി പാർക്കുകൾ വികസിപ്പിക്കുന്നതിനുള്ള പ്രതിജ്ഞാബദ്ധത സലേം അലി അൽ മുഹൈരി ഊന്നിപ്പറഞ്ഞു.കഴിഞ്ഞ വർഷം ഷാർജ മുനിസിപ്പാലിറ്റി നടപ്പാക്കിയ കാർഷിക പദ്ധതികളുടെ ഭാഗമാണ് അൽ ഖറാഇൻ പാർക്ക് 2 എന്നും ഷാർജ നഗരത്തിലെ പാർക്കുകളിൽ പുതിയ കൂട്ടിച്ചേർക്കലാണെന്നും ഷാർജ മുനിസിപ്പാലിറ്റി ഡയറക്ടർ ജനറൽ ഉബൈദ് സഈദ് അൽ തുനൈജി വിശദീകരിച്ചു.

ഷാർജയിൽ 70ലധികം പാർക്കുകളുണ്ട്, താമസക്കാർക്കും സന്ദർശകർക്കും വിവിധ തരത്തിലുള്ള കായിക വിനോദങ്ങൾ ആസ്വദിക്കാനും വിശ്രമിക്കാനും പരിശീലിക്കാനും അനുയോജ്യമായ അന്തരീക്ഷം പ്രദാനം ചെയ്യുന്നു.കുട്ടികൾക്കും വിദ്യാർത്ഥികൾക്കുമായി വൈവിധ്യമാർന്ന വിനോദ-വിദ്യാഭ്യാസ ശിൽപശാലകൾ നടപ്പിലാക്കുന്നതിന് പാർക്കുകൾ ഒരു വേദിയൊരുക്കുന്നു.